Kosovari “bëhet italian” për t`i ikur dëbimit nga Gjermania

Për t`i ikur dëbimit nga Gjermania, një kosovar i moshës 21 vjeçare është prezantuar me dokumente të falsifikuara italiane.

Kur policët në Straubing të mërkurën rreth orës 18.30 e ndalojnë makinën e një 39 vjeçari për kontrollim rutinor trafiku, nga makina papritur kërcen dhe ik personi që e shoqëronte shoferin. Policët i vihen në ndjekje dhe e kapin atë pas pak, shkruan wochenblatt.de. Dhe me rastin e kontrollimit të bërë në vazhdim, ai u tregon atyre dokumente italiane të identifikimit.

Por policët e konstatojnë shpejt se bëhej fjalë për dokumente false dhe se i riu ishte shtetas kosovar me kërkesë azili të refuzuar në Gjermani, transmeton albinfo.ch. Pasi që ai ishte në listën për dëbim nga Gjermania, 21 vjeçari kishte siguruar dokumente italiane, me shpresë se mund të vazhdonte qëndrimin në Gjermani.

Pas kryerjes së masave policore ndaj tij, kosovari i është dorëzuar gjykatësit hetues./albinfo/