Kosovarët, grupi më i madh i azilkërkuesve në Baden-Württemberg
RajoniPress
17:05, 2 Dhjetor, 2014
Ata përbëjnë 19.4 për qind të numrit të përgjithshëm ose më shumë se shtetasit e Sirisë të cilët përbëjnë 19 për qind të këtij numri.
Në landin Baden-Württemberg të Gjermanisë gjatë muajit nëntor është shënuar një fluks rekord personash që kanë kërkuar azil. Në këtë periudhë janë regjistruar gjithsej 2997 azilkërkues që është më shumë se dyfishi i vitit të kaluar, kur ishin 1372 ish. Po ashtu nëntori paraqitet si muaji me më së shumti azilkërkues për ketë vit deri më tash, shkruan Stuttgarter Nachrichten.
Ajo që bie në sy në këtë statistikë është se më së shumti azilkërkues gjatë nëntorit kanë ardhur nga Kosova. Ata përbëjnë 19.4 për qind të numrit të përgjithshëm dhe është e habitshme se janë më shumë se azilkërkuesit nga zonat e krizës ose të luftës. Menjëherë pas kosovarëve vijnë shtetasit e Sirisë të cilët përbëjnë 19 për qind të numrit të përgjithshëm. Në vazhdim, 13 për qind të azilkërkuesve të ardhur gjatë nëntorit janë nga Serbia, Maqedonia dhe Bosnjë e Hercegovina (marrë së bashku).
Shtetet e përmendura ballkanike, përveç Kosovës, nga 6 nëntori konsiderohen si “vende te sigurta”. Kjo nënkupton se kërkesat e shtetasve përkatës përpunohen më shpejtë dhe azilkërkuesit në fjalë dëbohen me procedurë më të shpejtuar në vendet prej nga kanë ardhur. Vetëm 0.3 për qind të azilkërkuesve nga këto vende ia dalin të fitojnë azilin.
Kosova, prej nga aktualisht vijnë më së shumti azilkërkues, ende nuk është futur në listën e vendeve të sigurta nga Gjermania, edhe pse shtete si Franca dhe Austria e kanë bërë këtë, shkruan gazeta. Kosova nuk është futur në listën në fjalë dhe as nuk është debatuar futja e saj, i ka thënë gazetës një politikan i CDU-së. Sipas tij, një gjë e tillë do të refuzohej nga të Gjelbrit në Parlamentin Federal të Gjermanisë.
Gjatë 11 muajve të deritashëm të këtij viti në Baden-Württemberg kanë kërkuar azil 21936 persona. Llogaritet se deri në fund të vitit numri do të mbërrijë në 26 mijë, që do të ishte 53 për qind më shumë se në vitin e kaluar.
albinfo.ch
