Kosovare Asllani fiton medaljen e argjendtë

Suedia nuk ia arriti të fitojë në finalen e futbollit te femrat në Tokio

Kanada ka fituar medaljen e artë në futboll për femra, duke mundur Suedinë në finale me penallti 3:2. Sulmuesja e Suedisë, Kosovare Asllani fitoi kështu medaljen e argjendtë, shkruan albinfo.ch.

Koha e rregullt kishte përfunduar 1:1, ku Asllani kishte asistuar në golin e vetëm të Suedisë.

Në penallti, ishte pikërisht futbollistja me prejardhje nga Kosova e cila gjuajti e para dhe goditi shtyllën për të mos shënuar. Në fund, Kanada triumfoi 3:2.

Asllani bëhet shqiptarja e tretë që fiton medalje në Lojërat Olimpike në Tokio, pasi më herët fituan Distria Krasniqi dhe Nora Gjakova në xhudo, duke përfaqësuar Kosovën.

https://www.albinfo.ch/kosovare-asllani-fiton-medaljen-e-argjendte/