Kosova pranoi të marrë migrantë, Trump i shkruan letër falënderuese Osmanit përmend lidhjen e thellë SHBA-Kosovë

Presidentja e Kosovës Vjosa Osmani, ka marrë një letër nga Presidenti i Shteteve të Bashkuara të Amerikës, Donald J. Trump, përmes së cilës presidenti amerikan shkruan se vendimi për të pranuar shtetas nga shtete të tjera tregon gatishmërinë e fortë të Kosovës për të bashkëpunuar me Shtetet e Bashkuara të Amerikës, “duke shtuar se lidershipi në këtë çështje tregon fuqinë dhe dhembshurinë e popullit të Kosovës”.

Trump thekson SHBA dhe Kosova ndajnë një lidhje të thellë mes vete.

“Shtetet e Bashkuara të Amerikës dhe Kosova ndajnë një lidhje të thellë, të bazuar në respektin e ndërsjellë, vlera të përbashkëta demokratike dhe një vizion për një të ardhme paqësore dhe prosperuese. Përkushtimi juaj për forcimin e kësaj lidhjeje nuk ka kaluar pa u vërejtur, dhe jam i bindur se së bashku do të vazhdojmë të avancojmë qëllimet tona të përbashkëta,” ka theksuar Presidenti Trump në letrën e tij.

Sipas presidencës, Trump e falënderoi Osmanin “për përkushtimin dhe miqësinë ndaj Shteteve të Bashkuara, lidershipin e guximshëm dhe shpreh dëshirën për të thelluar bashkëpunimin në vitet që vijnë”.

Presidenti Trump gjithashtu shprehet: “Ju falënderoj sërish për lidershipin tuaj të guximshëm dhe për faktin që qëndroni si një mike e vërtetë e Shteteve të Bashkuara. Mezi pres të punojmë së bashku me ju në vitet që vijnë”, thuhet në njoftimin e presidencës.

“Në fund të letrës, Presidenti Trump i dërgon Presidentes Osmani edhe urimet më të mira nga Zonja e Parë e SHBA-ve, Melania Trump”, përfunon njoftimi.

Ndryshe, Kosova do të pranojë 50 emigrantë të dëbuar nga Shtetet e Bashkuara të Amerikës.