Kosova pa qeveri, Bosch: E dëmshme për vendin, biznesmenët po presin, s’kanë me kë të nënshkruajnë kontrata

Ish-ambasadori i Holandës në Kosovë, Robert Bosch, ka komentuar krizën politike në Kosovë që ka lënë vendin pa institucione me muaj të tërë.

Duke shprehur çudinë se si mund të propozohej Albulena Haxhiu 56 herë për kryeparlamentare, Bosch tregoi edhe për dëmet që po pësojnë qytetarët nga mungesa e institucioneve për shkak të këtyre këmbënguljeve.

“Kjo është pak e vështirë të thuhet me saktësi, por sigurisht situata ka qenë e çuditshme. Ishte e pazakontë që një kandidat për kryetar të Kuvendit të propozohej 56 herë edhe pse dihej se nuk do të zgjidhej. Pse të vazhdohej me një proces që nuk çonte askund? Askush nuk mund të thotë se kjo nuk është diçka e çuditshme. Në fund, çështja u dërgua në Gjykatën Kushtetuese për të konstatuar se nuk mund të përsëritet pafund. Por pyetja mbetet pse nuk shkoi më herët atje për të arritur një zgjidhje?

Ai tha se ka dëgjuar biznesmenë që po presin për krijim të qeverisë në mënyrë që të kenë me kë të nënshkruajnë kontratat meqë qeveria në detyrë nuk mund ta bëjë këtë.

“Kjo situatë është e dëmshme për vendin, sepse shumë procese nuk mund të nënshkruhen. Kam dëgjuar edhe biznesmenë këtu që thonë se janë në pritje të kontratave, por askush nuk është i autorizuar t’i nënshkruajë, pasi qeveria është vetëm kujdestare dhe nuk ka kompetencë për vendime të tilla. Kjo dallon nga Holanda, për shembull, ku edhe qeveritë kujdestare mund të nënshkruajnë shumë vendime; Parlamenti mund të mos pajtohet, por të paktën vendi nuk paralizohet. Këtu, për arsye që nuk i kuptoj, proceset janë bllokuar plotësisht”, tha Bosch për EO.