Kosova në dysh rreth Lajçakut nga BE-ja, kundërshton fort presidenti

Ministri i Jashtëm i Sllovakisë, Miroslav Lajçak, pritet të jetë përfaqësuesi i posaçëm i Bashkimit Evropian në dialogun Kosovë – Serbi pas emërimit të Richard Grenellit nga SHBA-ja. Mirëpo me këtë propozim të BE-së nuk po pajtohet presidenti i Kosovës Hashim Thaçi, i cili deri më tani ka qenë një ndër protagonistët kryesorë të dialogut me Serbinë. Përderisa nga Qeveria e Kosovës nuk e kanë komentuar emërimin potencial të Lajçakut, njohësit e politikave evropiane po e shohin atë si të dobishëm në këtë proces, shkruan sot e përditshmja Zëri.

Pas emërimit të emisarit special për dialogun Kosovë – Serbi nga Shtetet e Bashkuara të Amerikës edhe Bashkimi Evropian po synon të emërojë një përfaqësues special në këtë proces. I propozuari i BE-së për këtë pozitë është ministri aktual i Punëve të Jashtme të Sllovakisë, Miroslav Lajçak. Në lidhje me emërimin e Lajçakut përfaqësuesi i lartë i Bashkimit Evropian për Politikë të Jashtme dhe Siguri, Josep Borrell, ka diskutuar edhe me udhëheqësit e Kosovës dhe të Serbisë.