“Kosova ndryshon veç kur ndryshon LDK-ja”, Haziri përballet me valë kritikash: “Vetëm te ju humbja festohet”

Gjilan – Një postim i nënkryetarit të Lidhja Demokratike e Kosovës, Lutfi Haziri, ka nxitur reagime të shumta dhe komente kritike në rrjetet sociale, menjëherë pas përfundimit të procesit zgjedhor.

Haziri shkroi se “Kosova ndryshon veç kur ndryshon LDK”, duke falënderuar qytetarët për besimin e dhënë dhe duke theksuar se për gati katër dekada ka mbetur besnik ndaj frymës së Rugovizmit.

“LDK ka shkaktuar procese dhe ka realizuar ëndrra. Pa LDK-në, as nuk shkaktohen e as nuk mbyllen proceset”, ka deklaruar Haziri në postimin e tij.

Megjithatë, deklaratat e tij nuk janë pritur mirë nga një pjesë e komentuesve, të cilët kanë vënë në pikëpyetje arsyet e optimizmit të shprehur nga drejtuesit e partisë pas rezultatit zgjedhor.

“Reforma i duhet LDK-së. Rugova e ka kryer misionin e vet, tani duhet një lider i ri”, ka shkruar një komentues.

Një tjetër qytetar ka ironizuar festën e partisë, duke pyetur: “Si mundet një parti që del e treta në zgjedhje të festojë më shumë se partia e parë?”

Në mesin e komenteve më të pëlqyera ishte edhe reagimi: “Vetëm te ju humbja festohet”, ndërsa të tjerë kanë kërkuar reforma të brendshme dhe ndryshime në udhëheqjen e partisë.

Komentues të shumtë kanë vlerësuar se rezultati i LDK-së nuk përbën ndonjë rritje domethënëse krahasuar me zgjedhjet e kaluara, duke shprehur habinë për entuziazmin e shfaqur nga disa figura të partisë.

Debati i hapur në rrjetet sociale pasqyron pakënaqësitë dhe pritjet e një pjese të elektoratit të LDK-së, i cili kërkon reflektim, reformim dhe një vizion të ri politik pas rezultateve të fundit zgjedhore.

Ndër komentuesit që reaguan në postimin e Hazirit ishin: Gazmend Dallku, Agim Krs, Argjend Selmani, Armend Brahimi, Blerim Husejni, Agim Zeqiri, Samet Emini dhe Besmir Sadrija./rajonipress/