Kosova mëson kundërshtarët potencialë për eliminatore

Ceremonia e hedhjes së shortit për eliminatoret e botërorit “Rusia 2018” do të mbahet të shtunën (sot) në St Petersburg.

Krerët e Federatës së Futbollit të Kosovës (FFK), shkruan sot Koha Ditore, ceremoninë do ta përcjellin nga televizori, pasi FFK-ja nuk është pjesë e UEFA-s dhe FIFA-s, rrjedhimisht as Përfaqësuesja e Kosovës nuk do të jetë pjesë e shortit.

Megjithatë, drejtuesit e FFK-së shpresojnë që Kosova do të jetë pjesë e këtyre eliminatoreve. Kosova shpreson që deri në muajin mars të vitit të ardhshëm të pranohet në FIFA me drejta të plota.

Më pas të vendoset në njërin nga dy grupet që do të kenë nga pesë përfaqësuese (H dhe I). Grupet tjera do të kenë nga gjashtë ekipe.

“Ne presim të pranohemi në kongresin që do të mbahet në muajin mars. Në prill do të vendoset edhe për dy grupet që do të jenë me nga pesë përfaqësuese e që shpresojmë në njërën prej tyre të jemi edhe ne. I urojmë suksese Shqipërisë që të ketë një grup sa më të lehtë dhe njëherësh presim që edhe ne të jemi në njërin prej grupeve më të lehta. Shpresojmë që kjo punë do të kryhet menjëherë pas pranimit tonë”, ka thënë nënkryetari i Federatës së Futbollit të Kosovës, Agim Ademi.

http://koha.net/?id=6&l=67845