Kosova me Strategji për Cilësinë në Arsim

Ministria e Arsimit, Shkencës dhe e Teknologjisë e Kosovës (MASHT) ka prezantuar të martën Strategjinë për Sigurimin e Cilësisë në Arsimin Parauniversitar në Kosovë 2016-2020. Ndonëse, kjo Strategji është prezantuar si një udhërrëfyes se si duhet të ngrihet cilësia në sistemin arsimor parauniversitar, njohës të fushës së arsimit janë skeptikë nëse kjo strategji mund të ndryshojë gjendjen në arsim.

Kosova edhe më parë si dokumente disponon Planin strategjik të arsimit në Kosovë 2011-2016 të hartuar në vitin 2011, Strategjinë për zhvillimin e arsimit parauniversitar në Kosovë 2007-2017 të hartuar në vitin 2007… Megjithëkëtë, në kuadër të Projektit të Binjakëzimit nga MAShT, e mbështetur nga Bashkimi Evropian dhe Culture Contakt Austria, MASHT-i ka prezantuar dhe strategjinë e re në një konferencë të përbashkët të mbajtur në Prishtinë.

Ministri i Arsimit, Arsim Bajrami, ka thënë se shtylla e parë e kësaj Strategjie është reformimi i procesit të mësimdhënies, në mënyrë që të ofrohet një mësimdhënie moderne. Bajrami ka thënë se do të punohet në promovimin e një mësimdhënie moderne përmes metodologjisë moderne të mësimdhënies./zeri/