Kosova me bazë të mirë ligjore anti korrupsion, por nuk zbatohet

Prishtinë – Kosova ka pakon ligjore më të përparuar se të gjitha vendet në lidhje me luftën ndaj korrupsionit dhe mbrojtjen e informatorëve, mirëpo pamundësia e aplikimit të këtyre ligjeve, po bën që vendi të jetë ende në renditje të vendeve me probleme në korrupsion. Kështu është thënë në tryezën e organizuar nga Lëvizjes Fol në lidhje me këto çështje, transmeton KTV.

Ministri i Drejtësisë, Hajredin Kuçi, ka thënë se në Kosovë ka korrupsion, por nuk duhet të fshihet edhe fakti se është duke u luftuar kjo dukuri nga institucionet kompetente. Kuçi ka thënë se për mbi 95% të rasteve për korrupsion janë dhënë dënimet.

Ai ka kërkuar nga shoqëria civile bashkëpunim më të ngushtë për luftimin e këtyre dukurive dhe për të bindur njerëzit që të informojnë gjykatat për rastet korruptive. Ndërkaq, nga mediat ka kërkuar që të dallojnë aktakuzën dhe aktgjykimin.

Në hulumtimin e bërë nga Lëvizja Fol ka dalë se mbi 73% të zyrtarëve publikë janë në dijeni për ligjet kundër korrupsionit, 6% nuk dinë për të, kurse 15% nuk janë në dijeni se Kosova ka ligje të tilla.