Kosova kërkon t’i jepet fund misionit të UNMIK-ut

Zyrtarët e Kosovës kanë nisur të kërkojnë hapa konkretë për t’i dhënë fund misionit të Kombeve të Bashkuara në Kosovë, UNMIK e ndryshimin e Rezolutës 1244 të OKB që hodhi bazat për misionin ndërkombëtar.

Por, një vendim mbi kërkesën e çdo ndryshim të rolit të UNMIK-ut do të duhet të bëhet nga Këshilli i Sigurimit i OKB-së, që përfshin Rusinë e Kinën që janë kundër njohjes së Kosovës. Serbia, e cila nuk e ka njohur kurrë pavarësinë e republikës së shkëputur, do t’i kundërvihet gjithashtu një përpjekjeje të tillë.

Ministri i Jashtëm i Kosovës Enver Hoxhaj tha për SETimes se misioni duhet të përfundojë.

“Mendojmë se janë përmbushur të gjitha kushtet që Këshilli i Sigurimit të marrë një vendim, të sjellë një rezolutë të re e ta përfundojë misionin e UNMIK-ut në Kosovë pasi ky (mision) nuk është i përdorshëm më. Eshtë i panevojshëm e jam shumë i sigurtë se OKB buxhetin që e ka në dispozicion të saj për Kosovën mund ta përdorë për vende të cilat ballafaqohen me krizë”, tha Hoxhaj.

Hoxhaj tha se UNMIK mund të transformohet në një partner për anëtarësimin e Kosovës në OKB.

“Wshtë koha që të fillohet një debat në një drejtim të tillë e të shihen mundësitë edhe në rrafshin politik, edhe mundësitë e tjera ligjore, edhe procedurale, sesi ky mision do të duhet të përfundojë në Kosovë”, tha ai.

Zëdhënësja e OKB-së Morana Song nuk deshi të komentonte përveç se të vinte në dukje se vendimi do t’i mbetet Këshillit të Sigurimit.

Hoxhaj tha se marrëveshja e Brukselit e arritur këtë vit midis Serbisë e Kosovës, në të cilën Serbia pranoi integritetin territorial të Kosovës, duhet të ishte një faktor në çdo diskutim të OKB-së mbi çështjen. Kosova gjithashtu nisi bisedimet këtë vit për nënshkrimin e një marrëveshje të stabilizimit e shoqërimit me Bashkimin Evropian.

UNMIK ka pasur një rol të rëndësishëm në Kosovë që nga ngritja e tij më 1999, tha Hoxhaj, por dobia e tij po i afrohet një fundi.

“E kemi thënë disa herë e do të këmbëngulim që UNMIK ta përfundojë punën e tij në Kosovë e Kosova të jetë anëtare e OKB-së dhe anëtare e sistemit të OKB-së”, tha Hoxhaj.

Zyrtarët e Beogradit kanë thënë se misioni duhet të qëndrojë i paprekur për të mbrojtur serbët në Kosovë.

“Të gjitha institucionet që mbajnë një status neutral përbëjnë një problem për Prishtinën sepse ajo shpreson për njohjen e pavarësisë nga komuniteti ndërkombëtar e nga Serbia gjithashtu”, tha Aleksandar Vulin, shef i Zyrës serbe për Kosovë në Beograd.

“UNMIK është një organizatë që ende ka rëndësinë më të madhe ligjore për Serbinë e në respektimin e vendimit të Këshillit të Sigurimit të OKB-së e gjendjes në terren. UNMIK është gjithashtu kreu i të gjitha organizatave ndërkombëtare në Kosovë”, tha Vulin.

Seb Bytyçi, drejtori ekzekutiv i Institutit të Politikës Ballkanike, tha se nuk ka të ngjarë që OKB të ndryshojë rolin e UNMIK-ut.

“Vështirë të mendohet se një rezolutë që i jep fund UNMIK-ut mund të dalë për ta trajtuar çështjen e statusit të Kosovës. Nëse Rusia ndryshon metodën e saj ndaj Kosovës, ajo do të ishte e mundshme, por ajo nuk shihet në horizont. Gjithashtu, shanset që kjo çështje të vendoset në rendin e ditës të Këshillit të Sigurimit janë të vogla, duke patur parasysh krizat ndërkombëtare në rajone të tjera, sidomos në Lindjen e Mesme”, tha Bytyçi për SETimes./telegrafi/