Kosova – hinterllandi i gjeopolitikës shqiptare

Nga Sadri Ramabaja – Kosova, pas një shekulli, rikthehet në pozicionin që kishte para vitit 1912 – tutje mbetet hinterllandi i gjeopolitikës shqiptare. Si e tillë ajo nuk mund t’i lihet në dorë dyshes Thaçi-Mustafa.

Serbia për gadi një shekull ishte fuqia dominuese në Evropën Juglindore, duke u shndërruar për një kohë edhe në një lloj ekuilibruesi (nën siglën e Jugosllavisë) mes dy superfuqive të kohës (SHBA vs BRSS).

Pas shpërbërjes së Jugosllavisë, sërish konstantë themelore e politikës serbe mbetet qëllimi i saj për të konsoliduar këtë pozicion edhe në konstelacionet e reja gjeopolitike.

Në këtë betejë të Beogradit, duket se qenia e dyshes Thaçi-Mustafa në krye të Republikës së dytë shqiptare nuk është i rastësishëm.

Ky momentum u shfrytëzua nga Beogradi dhe produkt i kësaj strategjie vepruese ishte marrëveshja e 19 prillit 2013 dhe ajo e 25 gushtit 2015.

Në tre – vjetorin e marrëveshjes së 2013-ës, dyshja Thaçi-Mustafa po pregaditen që, rikthimin e Serbisë në Kosovë përmes Zajednicës, pas asaj që konstatoj Gjykata Kushtetuese lidhur me marrëveshjet e 25 gushtit, ta bëjë akt të kryer përmes katapultimit të fshehur të statutit për Asociacionin e Komunave me shumicë serbe (Zajednicës), gjatë muajve të verës.

Me këtë veprim të paralajmruar edhe nga qarqe qeveritare dhe diplomatike, rrezikohet seriozisht Republika e Kosovës dhe perspektiva e integrimit të hapësirës shqiptare.

Shih për këtë, është imediate që Tirana zyrtare të rishikojë strategjinë politike, që bashkë me forcat politike në Kosovë, të impenjohet fuqishëm dhe të pamundësojnë konsolidimin e dominancës gjeopolitike të Serbisë në rajon.

Kjo ndërmarrje kërkon aleanca të konsoliduara si me fqinjtë tanë, ashtu edhe me partnerët tanë strategjik euroatlantik (SHBA-të, Gjermanin, Austrinë…).

Kundër këtij veprimi diversiv të koordinuar mes qeverive Vuqiq -Mustafa, do të duhej të vihej në lvizje i gjithë Kombi.

Kosova, tutje mbetet hinterllandi i gjeopolitikës shqiptare. Si i tillë ai nuk mund t’i lihet në dorë dyshes Thaçi-Mustafa. Prandaj, Kosova më shumë se interes politik e partiak, mbetet tutje domeni qenësor i interesit kombëtar.