Kosova e do Isën në Boletin

Figura e Isa Boletinit i ka bërë bashkë, për të parën herë, dy taborët politikë në Kuvendin e Kosovës, pozitën dhe opozitën të cilët kërkuan njëzëri, që eshtrat e heroit kombëtar të rivarrosen në Boletin, fshatin e tij të lindjes. Reagimi i tyre pason një vendim të Qeverisë së Kosovës dhe asaj të Shqipërisë, që eshtrat e Isa Boletinit të varrosen në Vlorë, aty ku janë vënë themelet e shtetit shqiptar.

Deputetë dhe përfaqësues të partive politike në Kosovë kanë kërkuar që të tërhiqet vendimi i Qeverisë. Në emër të grupit parlamentar të AAK-së, shefja e grupit Donika Kadaj-Bujupi ka thënë se zhvendosja e eshtrave të Isa Boletin në Vlorë flet për maturinë e ekzekutivit të vendit, të cilët me veprimet e veta po i fyejnë jo vetëm të gjallët, por edhe të vdekurit.

Kadaj-Bujupi madje ka thënë se rivarrimi i eshtrave të Isa Boletinit po bëhet në Vlorë për disa arsye, për të cilat ajo tha se Qeveria e di më mirë. “Heronjtë kombëtarë Isa Boletini e pasardhësit e tij Adem Jashari, Luan e Shkëlzen Haradinaj, Zahir Pajaziti e mijëra gra e burra të rënë ndër shekuj, meritojnë të paktën të prehen në paqe në dheun e Kosovës”./zeri/