Korrupsioni nuk luftohet me ankesa, drejtësia kosovare duhet të jep llogari

Ndërtimi i sundimit të ligjit dhe ndërtimi i një sistemi të efektshëm, në të cilin qytetarët kanë besim, është shumë i rëndësishëm për Kosovën dhe integrimin e saj në Bashkimin Evropian.

Kështu ka deklaruar ambasadorja e Shteteve të Bashkuara, Tracey Ann Jacobson, në një tryezë të rrumbullaket në kuadër të fushatës “Drejtësia dhe Qytetarët”.

Ambasadorja Jacobson ka thënë se qasja, transparenca dhe llogaridhënia në sistemin e drejtësisë janë shumë të rëndësishme.

“Raportet ndërmjet qytetarëve dhe organeve të drejtësisë janë të rëndësishme jo vetëm për kredibilitetin e sistemit të drejtësisë në Kosovë, por edhe për kredibilitetin e Kosovës në botë”.

“Mbetet ende shumë punë për t’u bërë. Është diçka tjetër mundësia për të bërë ankesa, por diçka tjetër të kuptuarit e procesit se ku do të shkojë ajo ankesë. Dhe, mendoj se ende nuk kemi arritur në atë pikë”, ka thënë Jacobson.

Ajo ka thënë se organet e drejtësisë në Kosovë e kanë për detyrë të japin llogari, të punojnë pa presion dhe të jenë të paanshme.

Fushata “Drejtësia dhe qytetarët” ka për qëllim rritjen e vetëdijes së qytetarëve të Kosovës për ushtrimin e të drejtave dhe detyrimeve në sistem të drejtësisë, si dhe rritjen e përgjegjshmërisë së vetë sistemit të drejtësisë në Kosovë./express/