Kontrabanda dhe MTI-ja degradojnë tregun e karburanteve

Moszbatimi i ligjit dëmton qindra miliona euro buxhetin. Shoqata e Naftëtarëve kërkon vendosjen e rregullit

Kryetari i Shoqatës së Naftëtarëve të Kosovës, Fadil Berjani, tha se maunat me naftë kontrabandë me siguri nuk lëvizin nëpër ara e as fusha, por qarkullojnë lirshëm dhe nëpër rrugë të asfaltuar

Me gjithë zotimet e pushtetarëve se në veriun e Kosovës është ndërprerë kontrabanda me produkte të naftës, një dukuri e tillë ka vazhduar edhe pas dislokimit të doganierëve dhe pjesëtarëve të Policisë së Kosovës në dy pikat kufitare, në Jarinje dhe Bërnjak.

Burime nga kjo pjesë e Kosovës tregojnë se tregu kosovar i derivateve të naftës me të madhe po vërshohet me produkte derivatesh të naftës që vijnë nga Serbia që hyjnë përmes rrugëve ilegale. Sipas burimeve të gazetës këto derivate të naftës nuk janë cilësore.

Zyrtarët e MTI-së kanë heshtur përballë këtyre fakteve, kurse njohësi i kësaj fushe, Jakup Gashi, tha se veriu i Kosovës është problem politik, por duhet të merren masa preventive, të cilat do ta pengonin kontrabandën.”Çdo produkt i cili kontrabandohet ka ndikime në buxhetin edhe ashtu të varfër të Republikës së Kosovës edhe mosmatja e dendësitetit paraqet evazion fiskal, pasi që nafta importohet në tonelata, kurse akciza është për litër ndërkohë që shndërrimi bëhet përmes peshës specifike dhe tani për tani pesha specifike merret ashtu siç paraqitet nga vetë kompanitë importuese”, theksoi ai./kosova sot/