Konsumatorët, të pambrojtur!

Produkte më afat të skaduar dhe me cilësi të dyshimtë në treg, zbritjet mashtruese të çmimeve, mospërmbajtja e garancionit të produktit, janë disa nga ankesat e shumta të konsumatorëve kosovarë. Pavarësisht se legjislacioni kosovar e mbron konsumatorin ndaj mashtrimeve të tilla, këta të fundit thonë se Ligji nuk është i zbatueshëm edhe në praktikë.

Selatin Kaçaniku, kryetar i organizatës joqeveritare “Konsumatori” thotë për “Zërin” se Ligji për Mbrojtjen e Konsumatorit në Kosovë nuk funksionon si duhet.

“Siç po shihet roli, obligimi, kontributi…qenia e qytetarit konsumator taksapagues është shumë më kompleks seç pandehin disa “…atje lart…”. Arsyeja, obligimi, detyrimi për transparencë, llogaridhënie dhe ndarje të përgjegjësive është shumë më i madh seç janë premtimet ose zotimet deklarative. Siç po e shihni edhe zotimet e marra me MSA-ja po çalojnë në përmbushje. MSA-ja një modul ia kushton konsumatorit. Tërthorazi e gjithë MSA-ja i dedikohet qytetarit konsumator. Nga kjo del se duke vazhduar angazhimin për kauzën e konsumatorit angazhohemi edhe për ekonominë, edhe për bizneset, edhe për MSA-në, edhe për Kosovën”, deklaron ai.

Në Agjencinë e Ushqimit dhe Veterinës thonë se të gjitha parregullsitë që janë evidentuar nga ankesat e konsumatorëve i ka dërguar në gjykatë. Ata thonë se vetëm gjatë muajve të parë të këtij viti, AUV-i ka asgjësuar mbi 150 mijë kilogramë produkte të mishit si jocilësor./zeri/