Konsumatorët mbajnë barrën e dështimeve të KEK-ut

Prishtinë – Konsumatorët e KEK-ut po vazhdojnë të mbajnë gjithë barrën për dështimet e KEK-ut dhe të institucioneve të tjera qeveritare e gjyqësore në uljen e humbjeve teknike dhe atyre komerciale.

Niveli i këtyre humbjeve ka rënë nga viti në vit, por ato vazhdojnë të mbesin në nivel të lartë, pasi gjatë vitit 2012 saktësisht 30.4 për qind e humbjeve u është faturuar konsumatorëve. Po ashtu konsumatorëve u faturohet edhe 1.8 për qind e humbjeve që ndodh në Transmision. Kaq ka qenë niveli i humbjeve që ZRRE-ja ka pranuar të fusë në faturat e energjisë elektrike për vitin 2012.

Koston e humbjeve si teknike ashtu edhe komerciale e mbulojnë konsumatorët e energjisë elektrike. Konsumatorit i faturohet edhe energjia elektrike që furnizohet veriu i Kosovës, atje ku KEK-u nuk ka qasje tash e një kohë të gjatë. Shprehur në numra, nëse një qytetar ka pasur një faturë prej 50 eurosh në muaj, atëherë ai ka paguar rreth 16 euro për t’i mbuluar këto humbje të energjisë elektrike. Ndërsa 34 euro i ka paguar për energjinë që e ka shpenzuar.

Por, prapë faturimi i humbjeve është nën nivelin e humbjeve reale. Korporata Energjetike e Kosovës ka raportuar se niveli i humbjeve totale gjatë vitit 2012 ka qenë 36.6 për qind. Në këto humbje janë kalkuluar edhe humbjet e energjisë në veriun e Kosovës, atje ku KEK-u nuk ka qasje tash e disa vjet. Koston e çdo humbjeje mbi nivelin prej 30.4 për qind e bart KEK-u dhe jo konsumatori i saj.

Gjatë vitit 2013 niveli i humbjeve që do të faturohet do të jetë më i ulët falë një vendimi të ZRRE-së, që ka vendosur caqet që duhet t’i arrijë KEK-u sa i përket uljes së humbjeve. Gjatë këtij viti humbjet e faturuara do të jetë 27.4 për qind, që janë për 3 pika të përqindjes më pak se ato që ishin faturuar vitin e kaluar.(koha)