Konjufca: Thaçi po sillet si monark absolut

Shefi i Grupit Parlamentar të LVV-së, Glauk Konjufca, ka konsideruar se ngritja e idesë së presidentit për korrigjim të kufirit me Serbinë, nuk është problemi i vetëm aktualisht, raporton “Zëri.info”.

Përkundrazi, sipas tij, problemi është shumë më i gjerë në këtë drejtim.

“Problemi shkon përtej kësaj. Mbi të gjitha kemi të bëjmë me lëkundjen e sistemit politik të Kosovës dhe të rendit kushtetues. Ai e ka keqkuptuar mandatin e tij si president. Po sillet bash si monark absolut. Monarkët absolutë e kanë konsideruar territorin si pronë private”, ka potencuar ai.

Qasja e presidentit për korrigjim të kufirit sipas Konjufës paraqet kthim mbrapa për Kosovën.

“Krejt kjo filloi në qershor të këtij viti kur presidenti doli tha se nuk ka vija të kuqe me Serbinë. Kjo i bien që në tavolinë mund të flitet gjithçka. Ai mendon që gjithçka është e negociueshme. Kjo i bie që as statusi i Kosovës nuk është i panegociueshëm. Kjo paraqet kthim mbrapa për Kosovën”, nënvizoi ai.

Rrjedhimisht, sipas tij është hera e parë që një president i Kosovës i ka kontestuar kufijtë e vet.

Andaj, ai propozoi që Thaçit t’i ndalohet çdo takim me përfaqësuesit e Serbisë.

“Unë mendoj që kjo rezolutë është e mirë. Por duhet që ta shtojmë edhe një pikë. Duhet që me një pikë të rezolutës Thaçit t’ia kufizojmë çdo takim me Serbinë. Vetëm atëherë kjo rezolutë është e mirë. Një pikë duhet të thotë që Thaçi nuk duhet të takohet asnjëherë me Serbinë dhe asnjë vendim të mos e marrë me Serbinë. Vetëm atëherë mund të jemi të qetë”, potencoi Konjufca./Zëri