Konjufca: Duam ta rrezojmë pushtetin, por në pushtet vijmë vetëm përmes zgjedhjeve
“9 janari do të jetë dita kur pushteti duhet të shkojë bashkë me marrëveshjet për Asociacionin dhe Demarkacionin”, ka deklaruar në KTV për emisionin Rubikon shefi i Grupit Parlamentar të Vetëvendosjes, Glauk Konjufca.
Ai ka thënë se qeveria e ka humbur mundësinë e saj për ta nxjerrë keq opozitën, pasi edhe po pretendon se ne po duam pushtet, në momentin kur nuk anuloi marrëveshjet.
Konjufca ka mohuar se qëllimi i tyre është të marrin me dhunë institucionet.
“Qëllimi nuk është t’i marrim institucionet me dhunë, por me trysninë që e bëjmë të sjellim zgjedhje të reja. Vetëm me proces demokratik mund të merret pushteti e që janë zgjedhjet. Qeveria mund të rrezohet me dhunë, por jo edhe ardhja në pushtet.”
Për të asgjë nuk ka personale mes opozitës e Isa Mustafës, përveç faktit se ai e shndërroi në ferr Kosovën.
Ai tha se fillimi i rënies se kësaj qeverie ishte momenti i marrëveshjes së Rashkës.
I bindur se ka qenë opozita që ka ndikuar edhe te gjyqtarët e Kushtetueses, për të marrë vendim të drejtë për Asociacionin, Konjufca ka paralajmëruar se bllokadë të tillë do të ketë edhe në seancat e ardhshme parlamentare.
Duke e cilësuar planin e Ahtisaarit si lak rreth fytit për Kosovën, Konjufca theksoi se Vetëvendosje është për t’ia marrë veton komunitetit serb brenda parlamentit, pasi sipas tij, ata po i dirigjojnë 110 deputetët e tjerë.
Ndërsa ka paralajmëruar se protesta e së shtunës do të jetë paqësore.
“Protesta nga ana e jonë do të jetë paqësore, por nuk e dimë si do të jetë reagimi i regjimit. Përgjegjësinë e ka gjithkush çka bën”.