Komuna “përmbush” premtimet ndaj qytetarëve

Gjilan – Problemet që i ka lënë qeverisja e kaluar, Komuna e Gjilanit nën udhëheqjen e kryetarit Lutfi Haziri po vazhdon t’i zgjidhë një nga një.

Komuna është dashur të intervenojë në mënyrë urgjente në rregullimin e kanalizimit në rrugën “Abdulla Presheva” (prapa Xhamisë së Medresesë), pasi nga reshjet e këtyre ditëve, ujërat fekal kanë dalë mbi sipërfaqen e tokës.

Qytetarët e kësaj lagjeje, të pakënaqur nga kjo gjendje, i janë drejtuar Zyrës së kryetarit Haziri më 18.07.2014, ku grupin e ka pritur në takim nënkryetari Rexhep Kadriu dhe pas konsultave të brendshme të kryetarit Haziri me vartësit e tij, është marrë vendimi që punët të nisin të shtunën më 19.07.2014.

Për të parë punimet në zgjidhjen e këtij problemi, nënkryetari i Komunës së Gjilanit Rexhep Kadriu ka dalë sot në terren, ndërsa u nda i kënaqur me dinamikën e punimeve.
“Punët këtu janë duke shkuar jashtëzakonisht mirë, me një dinamikë të mirë të punës. Punët po ecin mbarë, qytetarët janë jashtëzakonisht të kënaqur me intervenimin e shpejt të organeve komunale dhe shumë shpejt do të zgjidhet problemi këtu si për ujërat atmosferik, ashtu edhe për kanalizimin fekal”, ka thënë nënkryetari Kadriu./rajonipress/