Komuna financon shkollimin e mesëm për 22 femra me gjendje të rëndë ekonomike

Kamenicë – Kryetari i Komunës Begzad Sinani, e ka mbështetur kërkesën e Grupit të Grave të Kamenicës për financimin e projektit për vazhdimin e shkollimit të 22 femrave të cilat e kanë ndërpre shkollimin e mesëm për shkak të gjendjes së rëndë ekonomike.

Rreth 22 femra të komunës së Kamenicës i janë nënshtruar testit me shkrim dhe atij me gojë në shkollën e mesme teknike “Andrea Durrsaku” për klasën e dhjetë ( X), raporton rajonipress.

Gratë i kanë shprehur falënderim të veçantë Grupit të Grave të Kamenicës për iniciativën e ndërmarr për të krijuar mundësinë që ta përfundojnë ato shkollimin e mesëm pa pagesë.

Ibadete Ahmetaj, kryetare e Grupit të Grave të Kamenicës, tha se pas përfundimit të fazës së parë të këtij projekti, përkatësisht të klasës X, do të vazhdohet me klasën e XI.

Ajo e falënderoi kryetarin e komunës, Begzad Sinani, i cili pa kurrfarë hezitimi e ka përkrah këtë projekt të rëndësishëm shoqërorë, për të ndihmuar në ngritjen arsimore të femrës në komunën e Kamenicës./rajonipress/