Komuna e Vitisë u përgjigjet akuzave të PDK-së e LVV

Viti – Institucionet komunale të Vitisë, shprehin indinjatën dhe reagojnë ndaj shkrimeve të fundit që kanë për qëllim hedhjen e akuzave në adresë të Zyrës së kryetarit, siç është shkrimi i degës së PDK-së në Viti me titull: “Komuna e qeverisur nga Sokol Haliti vjedh edhe në varreza”.

Në këtë shkrim, pa asnjë argument sulmohet komuna, për gjoja keqpërdorimin “vjedhjen e parasë publike” duke e quajtur alarmante. Shprehim keqardhje për nivelin e tillë të komunikimit nga ana e opozitës, e cila shërbehet me informata(dezinformata) nga rrjetet sociale, duke e kopjuar një shkrim joprofesional të një individi, i cili për bazë ka vetëm urrejtjen ndaj individëve të caktuar dhe ndaj çdo arritje dhe suksesi nga ana e Qeverisë Lokale.

Bazuar në të dhënat e Zyrës së Prokurimit të komunës së Vitisë, PDK ka prezantuar një paramasë të kontraktuar në projektin e kontratës kornizë “Pastrimi dhe mirëmbajtja e rrugëve, hapësirave gjelbëruese, trotuareve, si dhe mirëmbajtja e varrezave të dëshmorëve, lumit dhe Parkut në Viti”, të cilën paramase e quan “pagesë” dhe akuzon në mënyrë perfide pa asnjë të drejtë, se aty gjoja qenkan pastruar varrezat, e që në fakt nuk është e vërtet sepse për atë Listë te varrezave që prezantohen, nuk është paguar asnjë cent nga ana e Autoritetit Kontraktues.

Edhe njëherë shprehim zhgënjimin tonë lidhur më këtë shkrim (kopje nga fb), duke ftuar udhëheqësit e PDK-së, që të mos të bien në ndikimin e lajmeve të rrejshme, sidomos njerëzve me motivacion degradues, por që të vijnë dhe të marrin dokumentacionin ne Komunë dhe të binden me të vërtetën.

Reagim ndaj një shkrimi të degës së Lëvizjes Vetëvendosje në Viti

Për të njoftuar opinionin e gjerë me gjendjen reale, posaçërisht pas një shkrimi që ka publikuar në media dega e Lëvizjes Vetëvendosje në Viti, me titull: “Falsifikime të projekteve me qëllime të përfitimit të kryetarit Haliti dhe klanit të tij”, komuna e Vitisë reagon duke quajtur këtë shkrim të pavërtetë dhe pa asnjë bazë. Komuna e Vitisë distancohet nga gjuha denigruese, fyese, abuzive dhe tendencioze, me qëllim të dezinformimit të opinionit publik nga ana e Lëvizjes Vetëvendosje në Viti.

Duke përdorë shënime të pasakta ( fatkeqësisht të marra kopje nga fb, të njerëzve të papërgjegjshëm), shprehim keqardhjen tonë që keni ra në nivelin e tillë sa të përdorni shënime “fake neës” në vend që të interesoheni për të vërtetën.

Në shkrimin e tyre që ka të bëjë me projektin “Rivitalizimi i ndërtesës së Komunë së Vitisë”, thuhen shumë të pavërteta vetën me qëllimin e degradimit të punës dhe aktiviteteve të mira të komunës, por shihet tendenca e degradimit të personalitetit të kryetarit por edhe të zyrtarit të prokurimit (me keqardhje konstatojmë e njëjta gjuhë është përdorur edhe në fb, nga individi të cilin e keni kopjuar).

Andaj ju themi se argumentet që ju tentoni ti përdorni, janë fjalë pa asnjë bazë, por shihet se keni rënë në lajthitje të mos njohurisë së procedurave dhe aktiviteteve, siç e ka bërë edhe sozia i juaj.

Edhe pse me një dëshmi të një paramase gjysmake, ju vini në një përfundim të kinse keq përdorimit të një shume parash, të cilën llogari ju e nxjerrni nga mosnjohuria e paramasave dhe parametrave, të cilët nuk i dispononi. Ju i përshkruani paramasat tenderuese si të përgatitura nga Zyrtari i prokurimit, çka nuk është e vërtet, sepse përgatitja nuk bëhet as nuk përpilohet nga kjo Zyrë, sepse as që kanë qasje në përgatitjen e paramasave tenderuese as të projekteve.

Duke shprehur keqardhjen për këtë dezinformim të opinionit, për projektin në fjalë, edhe pse projekti është i papërfunduar dmth është në zhvillim e sipër, është shumë tendencioze shkrimi i cili përhap një të pavërtetë që paragjykohet nga informatat gjysmake./rajonipress/