Komuna e Vitisë shpërndan 45 spërkatëse për fermerët, synon lehtësimin e punëve bujqësore

Viti – Komuna e Vitisë, përmes Drejtorisë për Bujqësi, Pylltari dhe Zhvillim Rural, ka shpërndarë 45 spërkatëse për fermerët lokalë, me qëllim të përmirësimit të kushteve të punës dhe rritjes së efikasitetit në sektorin e bujqësisë.

Në ceremoninë e shpërndarjes morën pjesë kryetari i Komunës së Vitisë, Sokol Haliti, dhe drejtori i Drejtorisë për Bujqësi, Naim Pira.

Me këtë rast, kryetari Haliti theksoi se përmes këtij projekti synohet të lehtësohet puna e fermerëve dhe të krijohen kushte më të mira për zhvillimin e aktiviteteve bujqësore.

Ai bëri të ditur se Komuna e Vitisë do të vazhdojë të mbështesë fermerët përmes projekteve të ndryshme, pajisjeve dhe mekanizmave të tjerë që kontribuojnë në zhvillimin e bujqësisë.

Shpërndarja e këtyre pajisjeve synon të ndihmojë fermerët në përditshmërinë e tyre, të rrisë efikasitetin e punës dhe të kontribuojë në fuqizimin e ekonomive familjare në komunën e Vitisë./rajonipress/