Komuna e Vitisë reagon ashpër ndaj ndërprerjeve të shpeshta të rrymës pa paralajmërim nga KEDS-i

Viti – Institucionet komunale reagojnë ndaj gjendjes së krijuar energjetike në komunën e Vitisë dhe ndërprerjet e shpeshta të rrymës pa paralajmërim.

Institucionet komunale të Vitisë, shprehin indinjatën me gjendjen aktuale të furnizimit me energji elektrike ditëve të fundit në këtë komunë. Ndërprerjet e shpeshta të energjisë dhe pa paralajmërim, kanë rënduar në masë punën e Institucioneve për shërbime të qytetarëve, e posaçërisht kur jemi në prag të festave të fundvitit dhe kur kemi fluks të mërgimtarëve që po vijnë për pushime.

Institucionet komunale të Vitisë, respektivisht Zyra e kryetarit të komunës Sokol Haliti, reagon ashpër ndaj kësaj gjendje të krijuar energjetike në komunën e Vitisë dhe apelon tek përgjegjësit e Kompanisë KEDS, që të jenë të përgjegjshëm ndaj qytetarëve dhe për këtë qëllim, madje do të ri shqyrtojnë bashkëpunimin me këtë kompani.

Zyra e kryetarit të komunës, paralajmëron një takim urgjent me përgjegjësit e kompanisë KEDS, rreth gjendjes së fundit të krijuar, sidomos ndërprerjet e shpeshta të energjisë elektrike në qytetin e Vitisë dhe lokalitetet e saja./rajonipress/