Komuna e Vitisë e përkushtuar ndaj sektorit të shëndetësisë

Viti – Kryetari i Komunës së Vitisë, Sokol Haliti i shoqëruar nga Drejtori për Shëndetësi dhe Mirëqenie Sociale, Basri Aliu ka vizituar sot Qendrën Kryesore të Mjekësisë Familjare në Viti ku krahas punimeve që janë duke u zhvilluar në rivitalizimin e kulmit të këtij objekti është duke u bërë fasadimi i tij si dhe është duke u rregulluar ambienti i jashtëm, konkretisht parkingu mbrapa Emergjencës në Viti.

Ata gjithashtu kanë vizituar edhe fshatin Gjylekar ku janë duke vazhduar punimet në ndërtimin e ambulantes.

Basri Aliu, Drejtor i Drejtorisë për Shëndetësi dhe Mirëqenie Sociale ndër tjerash ka folur për punët që janë duke u zhvilluar në sektorin e shëndetësisë në komunën e Vitisë. “Pos rivitalizimit të kulmit që është duke u punuar në objektin e QKMF-së në Viti, është duke punuar edhe në fasadimin e jashtëm të këtij objekti.

Ndërkaq pas objektit të Emergjencës kemi rregulluar një hapësirë prej rreth 14 ari për parkingje, gjithashtu është punuar edhe në Qendrën e Mjekësisë Familjare në Pozheran ku për skaj të rrugës magjistrale është rregulluar trotuari, gjelbërimi si dhe një pjesë e rrethojës “ u shpreh Aliu.

Ai po ashtu tha se po punohet edhe në objektin e ambulantes në Gjylekar duke potencuar se ata po angazhohen në realizimin edhe të shumë projekteve të tjera në fushën e shëndetësisë.

Ndërkaq Xhemajl Arapi, Drejtor i QKMF-së në Viti, tha se investimet në QKMF-në e Vitisë janë të mirëseardhur dhe janë në interes të personelit mjekësor por edhe të qytetarëve në përgjithësi./rajonipress/