Komuna e Kamenicës nënshkruan memorandum bashkëpunimi me Helvetas

Kamenicë – Komuna e Kamenicës ka lidhur memorandum bashkëpunimi me organizatën Helvetas. Ky memorandum ka për qëllim forcimin e bashkëpunimit në fushën e zhvillimit të qëndrueshëm, mbrojtjes së mjedisit dhe përmirësimit të shërbimeve komunale për qytetarët.

Drejtori i Urbanizmit, Uran Berisha, drejtori i Shërbimeve Publike, Zotrim Kastrati, si dhe drejtori i Bujqësisë, Shpend Morina, kanë pritur në takim përfaqësuesin e Helvetas, Mark Baskin së bashku me Ardita Rizvanolli dhe Arbana Kadriu.

Drejtorët theksuan rëndësinë e këtij partneriteti për rritjen e transparencës, efikasitetit dhe përfshirjes së qytetarëve në proceset komunale.

Ndër të tjera në takim është diskutuar se qëllimi i marrëveshjes është realizimi i një auditimi social për projektin për mbeturinat e ngurta, duke synuar përfshirjen e fermerëve, qytetarëve dhe ekspertëve në këtë fushë./rajonipress/