Komuna e Gjilanit nënshkruan marrëveshje për subvencionimin e qendrës “Pema”

Gjilan – Komuna e Gjilanit ka nënshkruar sot marrëveshje bashkëpunimi për subvencionimin e projekteve me interes për publikun për qendrën e kujdesit ditor “Pema” në vlerë prej 4 mijë euro.

Marrëveshjen e bashkëpunimit e ka nënshkruar sot kryetari i Komunës, Lutfi Haziri, ndërsa nënkryetari Rexhep Kadriu i ka pritur në takim përfaqësuesit e qendrës “Pema” dhe të organizatës One to One Children’s -Fund.

Nënkryetari Kadriu ka thënë me këtë rast se Komuna e Gjilanit e udhëhequr nga Lutfi Haziri është shumë e interesuar që t’u dalë në ndihmë të gjitha organizatave, e veçanërisht atyre që që janë jetike në shërbim të qytetarëve tanë.

Nga ana e saj, përfaqësuesja e organizatës “One to One Children’s- Fund, Liridona Zogaj, ka falënderuar Komunën e Gjilanit për subvencionimin e qendrës “Pema”, duke thënë se ky është një hap shumë i rëndësishëm drejt qëndrueshmërisë së shërbimeve sociale të ofruara përmes “Pema”, qendër kjo e cila përkrahet edhe nga “One to One Children’s -Fund dhe BE.

Sipas marrëveshjes, kontributi financiar i Komunës së Gjilanit për këtë projekt do të administrohet dhe raportohet nga ana e One to One Children’s- Fund dhe do të sigurohet shfrytëzimi efikas i fondeve në përputhshmëri me specifikat e marrëveshjes me Komunën.

Përndryshe, kryetari Lutfi Haziri gjatë këtij viti ka nënshkruar marrëveshje bashkëpunimi për subvencionimin edhe të shoqatës Handikos, të Shoqatës së të Verbërve dhe të Shurdhmemecëve./rajonipress/