Komuna e Gjilanit ka shkelur kriteret e subvencionimit të qumështit, për të favorizuar fermerët serbë e duke diskriminuar fermerët shqiptarë!

Gjilan – PDK në Gjilan vazhdon ta shfaq shqetësimin e saj për mënyrën e keqpërdorimeve të mëdha me buxhetin komunal, përmes subvencioneve që ndahen sipas shijeve të qeverisjes së VV-së.

Bazuar në raportin e komunës së Gjilanit, fermerët serbë janë favorizuar në subvencionimin për litër të qumështit që ishte 0.8 cent për litër. Në bazë të vendimit të kryetarit të komunës, fermerët nuk mund të jenë përfitues më shumë se 1,500.00 euro.

Me këtë vendim dhe kriter të kryetarit të komunës, një fermer serb (sipas listës përfituese nr.11 është M.S), i cili ka deklaruar 13,607.78 litra, e ka përfituar 1,500.00 euro, e që sipas kritereve është dashtë të përfitojë vetëm 1,088.56 euro, pra komuna ia ka ndarë më shumë 411.44 euro.
Ndërsa, shihet qartë që fermerët shqiptarë janë dëmtuar dhe diskriminuar nga kriteret dhe vendimi i kryetarit të Gjilanit.

Rasti konkret është i fermerit M. Sh që ka deklaruar 33,840.00 litra qumësht (pothuajse trefishin e fermerit serb), dhe ka përfituar njësoj në vlerën prej 1,500.00 euro. Njësoj edhe me fermerin tjetër Sh.B i cili për 33,257.00 litra qumësht ka përfituar po aq!

Ky favorizim duke shkelur kriteret dhe keqpërdor buxhetin e subvencioneve për fermerët serbë, e në anën tjetër të diskriminohen fermerët shqiptarë është i dëmshëm dhe i papranueshëm.

Nëse kryetari i komunës së Gjilanit u ka ndonjë obligim votuesve serbë prej zgjedhjeve komunale, atëherë duhet t’ua kthej në forma tjera, e jo përmes keqpërdorimeve buxhetore.

PDK kërkon që të vendoset ligjshmëria e plotë në shpenzimin e buxhetit komunal, e jo përmes shkeljeve të ligjit të prokurimit, shkeljeve të procedurave dhe kritereve, të bëhen pagesa dhe transaksione, e të abuzohet me paranë e taksave të qytetarëve të Komunës së Gjilanit thuhet në reagimin e PDK-së./rajonipress/