Komuna e Gjilanit ka mbajtur sot katër dëgjime publike për katër rregullore

Gjilan – Komuna e Gjilanit ka mbajtur sot katër dëgjime publike, ku janë prezantuar katër rregullore komunale që kanë të bëjnë me: Organizimin e brendshëm në shërbimin civil, Kodin e etikës, Kutinë e ankesave në institucionet e arsimit para-universitar si dhe Procedurën e ndërtimit të objekteve me karakter të përkohshëm.

Sa i përket Rregullores për organizimin e brendshëm dhe sistematizimin e vendeve të punës në Shërbimin civil komunal si dhe Kodit të Etikës, sqarime kanë dhënë drejtori i Administratës, Bardhyl Syla si dhe anëtarët e komisionit, Besim Azizi, Sadri Arifi e Tringa Ahmeti.

Rregullorja e parë, që për bazë ka ligjin për vetëqeverisje lokale si dhe statutin e Komunës, bënë standardizimin e vendeve të punës, sipas katalogut të cilin e ka hartuar qeveria, ka thënë Syla.

Në këtë pikë, me diskutime, kanë kontribuar Mursel Zymberi, Avdyl Aliu, Sherafedin Latifi, Habib Mahmuti e të tjerë.

Kurse Kodi i Etikës përcakton rregullat që një shërbyes civil është i obliguar t`i zbatojë gjatë punës, përfshirë orarin e punës, veshjen e të tjera, ka thënë drejtori Bardhyl Syla.

Në debatin për Kodin e Etikës janë përfshirë Nevzad Isufi, Avdyl Aliu, Fitim Guda, Sali Fazliu, Shemsedin Elezi, Afërdita Balaj, Burim Berisha dhe të tjerë, të cilët veçmas e kanë analizuar çështjen e tatuazheve.

Shpresa Kurteshi-Emini, kryesuese e Kuvendit, ka thënë se kjo pjesë e rregullores duhet të riformulohet më butë, sepse duhet të jemi të kujdesshëm që të mos cenojmë të drejtën dhe barazinë në pjesëmarrje.

Kurteshi-Emini tha se këtë segment duhet ta diskutojë edhe Kuvendi Komunal, para se të vendos.

Ndërkaq, sqarimet për Rregulloren për kutinë e ankesave në institucionet e arsimit para universitar i ka dhënë drejtori Nazim Gagica, ndërkaq për Rregulloren për procedurën e ndërtimit të objekteve me karakter të përkohshëm në pronat e personave fizikë dhe juridikë, sqarimet e duhura i ka bërë drejtori i Urbanizmit, Bekim Bajrami.

Qëllimi i këtyre diskutimeve është përfshirja e publikut, shoqërisë civile, zyrtarëve komunalë si dhe grupeve të interesit në procesin e hartimit të akteve komunale, të cilat pas zhvillimit të të gjitha procedurave të nevojshme ligjore, procedohen në Kuvend për miratim.

Pjesëmarrja e publikut në dëgjimet e sotme, nuk ka qenë e kënaqshme, mbase edhe për shkak të pandemisë dhe obligimit për të respektuar masat mbrojtëse./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).