Komuna e Gjilanit e para që do të ndërmerr nismën për unifikimin e pronave komunale

Gjilan – Ndërkaq sa i përket titullarit të pronave komunale, drejtori i Kadastrës, Sali Fazliu sqaroi se komuna e Gjilanit është e para që e ndërmerre një nismë të tillë unifikimin e titullarit të pronave komunale.

Komiteti për Politikë dhe Financa (KPF) ka mbajtur sot takimin e radhës, nën kryesimin e Shpresa Kurteshit-Eminit, ku ka shqyrtuar dhe rekomanduar për Kuvend Komunal raportin financiar janar-shtator 2020, propozim-vendimin për formimin e Grupit punues për hartimin e Planit të punës të Kuvendit për vitin 2021, propozim-vendimin për modifikimin e atributeve të titullarit të pronave komunale dhe regjistrimin e tyre me emërtimin ligjor, iniciativën për themelimin e Muzeut Etnografik në Gjilan, propozim-vendimin për emërimin e Komisionit Komunal të Aksionarëve në KRM “Ecohigjiena” si dhe vendimin për binjakëzimin e Komunës së Gjilanit me Komunën e Kumanovës.

Sa i përket planit të punës së Kuvendit për vitin 2021, kryesuesja Shpresa Kurteshi-Emini u shpreh e bindur se drejtoritë komunale do të jenë bashkëpunuese me grupin e punës në këtë proces, me qëllim të harmonizimit të agjendës së Kuvendit për vitin vijues.
‘Agjenda e punës së Kuvendit është e lidhur ngushtë me planet e punës së drejtorive komunale’, tha Kurteshi-Emini.

Kjo ishte edhe kërkesë e Ibish Ibishit, këshilltar i pavarur si dhe anëtarëve tjerë të Komitetit për Politikë dhe Financa.

Ndërkaq sa i përket titullarit të pronave komunale, drejtori i Kadastrës, Sali Fazliu sqaroi se komuna e Gjilanit është e para që e ndërmerre një nismë të tillë unifikimin e titullarit të pronave komunale.

Kurse në lidhje me propozim-vendimin për emërimin e Komisionit Komunal të Aksionarëve në KRM “Ecohigjiena”, Sadri Arifi nga sekretaria e Kuvendit sqaroi se një anëtar, përkatësisht Meral Sadriu Vokshi është tërhequr nga komisioni për shkak të emërimit në pozitën e drejtorit të Buxhetit dhe Financave dhe ky vend duhet të plotësohet.

Për të gjitha këto pika pritet të zhvillohet debat i gjerë në seancën e Kuvendit Komunal, e cila do të mbahet më 9 nëntor 2020./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).