Komuna e Gjilanit dhe Qeveria investojnë infrastrukturë rrugore në Shillovës

Gjilan – Qeveria e Republikës së Kosovës, respektivisht Ministria e Administrimit të Pushtetit Lokal dhe Komuna e Gjilanit, janë duke realizuar projektin për rehabilitimin e rrugëve në fshatin Shillovë e banuar nga komuniteti serb, në një vlerë të kontratës afër 40 mijë euro.

Në këtë inspektim të punimeve ishte nënkryetari i Komunës, Rexhep Kadriu, i shoqëruar nga drejtori i Shërbimeve Publike, Naser Korqa, drejtori i departamentit të Prokurimit, Sali Kqiku dhe këshilltari Komunal Sergjan Mitroviq.

Nënkryetari Kadriu, ka thënë me këtë rast se në vazhdën e investimeve në infrastrukturë publike në Komunën e Gjilanit sot është duke u bërë inspektimi i punimeve në fshatin Shillovë ku do të asfaltohen rrugë dhe rregullohet edhe sistemi i kanalizimit e ujësjellësit.
“Sot në vazhdën e inspektimit të punimeve jemi në vizitë projektit të rehabilitimit të rrugëve në fshatin Shillovë, ku do të asfaltohen disa rrugët përmes këtij projekti të bashkë-financuar me qeverinë, e që hyjnë edhe intervenimet në kanalizim dhe ujësjellës.

Vlera e kontratës është mbi 36 mijë euro duke përfshirë asfaltimin, intervenimin në ujësjellës dhe kanalizim në një gjatësi prej rreth 200 metra etj. Poashtu është duke u bërë intervenimi nëntokësor, për të vazhduar pastaj me asfaltim dhe kështu do të vazhdohet edhe në pjesë të tjera të qytetit dhe fshatrave, do të investohet infrastruktura nëntokësore pastaj asfaltimi i rrugëve”, ka thënë nënkryetari Kadriu.

Kadriu poashtu ka thënë se kontributi i komunitetit dhe kërkesat e qytetarëve do të shqyrtohen dhe në bazë të mundësive buxhetore por edhe prioriteteve do të investohet edhe me projekte në terren./rajonipress/