Kompanitë fantome pastrojnë milionat e pushtetarëve

Shpërdorimi masiv i fondeve publike nuk ka të ndalur. Drejtësia duarlidhur para abuzimit të hapur të Qeverisë

“Në vendet ku institucionet shtetërore kryejnë punën e vet sipas ligjit, transaksionet e këtyre kompanive i identifikojnë se janë fiktive dhe bëjnë ndjekjen penale. Niveli i funksionimit të këtyre kompanive është dëshmi e shkallës së jofunksionalitetit të institucioneve shtetërore”, u shpreh analisti Xhevat Meha

Që nga paslufta e deri më sot në Kosovë ka një numër të madh të kompanive fantome, që janë krijuar enkas për të marrë tenderët qeveritarë në shuma milionëshe. Ndërkaq, analistët e ekonomisë dhe specialistët e kësaj fushe thonë se arsyeja e vetme e themelimit të këtyre kompanive ‘fantome’ qëndron në synimin që të ‘legalizojnë’ paratë e pista të fituara nga krimet e bëra të klaneve mafio-ekonomiko dhe atyre politike përmes tenderëve qeveritarë.

Deputetë nga opozita thonë se në këto punë të pista se janë të përfshirë zyrtarët më të lartë politikë, përfshirë mbase edhe ministra që kanë krijuar nga rrethi i tyre edhe OJQ fantome, përmes së cilave ata ka vite që po marrin projekte nëpër ministritë e ndryshme dhe ato para prapë përfundojnë në xhepat e pushtetarëve dhe klaneve të lidhura me ata.

Besnik Bislimi, deputet nga lëvizja ‘Vetëvendosje’, tha për “Kosova Sot” se në vazhdimësi ka pasur tendenca për manipulim fondesh publike përmes krijimit të kompanive fiktive, të cilat konkurrojnë dhe gëzojnë favorizim gjatë ndarjes së tenderëve publikë. “Gjithsesi kjo i dëmton bizneset serioze, meqë u pamundëson qasjen në projektet e financuara prej sektorit publik”, theksoi ai./kosova sot/