Komiteti i Shërbimeve Publike miraton raportet e dy drejtorive të linjës

Gjilan – Komiteti për Shërbime Publike, Banim, Mbrojtje dhe Shpëtim (KSHPBMSH) ka miratuar të hënën raportet e punës së gjashtëmujorit të parë, të dy drejtorive të linjës dhe i ka lavdëruar ato për realizimin e detyrave të planifikuara.

Isa Agushi, kryesues i KSHBMSH, ka thënë se të dyja raportet janë gjithëpërfshirëse dhe të detajuara për punët e kryera gjatë kësaj periudhe të vitit, duke shtuar se me buxhet të varfër sa kanë Komunat, është vështirë të arrihen të gjitha përnjëherë.

Naser Korça, drejtor i Shërbimeve Publike, ka thënë se në të vërtetë raporti është pesëmujor dhe ka shtuar se të gjitha obligimet e planifikuara për këtë periudhë, janë kryer me sukses, ndërkohë që është përgjigjur edhe në pyetjet konkrete të anëtarëve të kësaj trupe komunale, Ilir Tahiri, Burhan Selmani, Mizafere Ismajli, Hamid Azemi, Krenare Latifi e Ramadan Ajvazi, që kishin të bënin me infrastrukturën rrugore, trotuaret, ndriçimin publik, sinjalizimin vertikal dhe horizontal, shpronësimet, trafikun urban dhe të tjera.

Ndërkaq, raportin e Drejtorisë për Mbrojtje dhe Shpëtim e ka prezantuar drejtori Ensar Kadriu, i cili ka nënvizuar ushtrimin e përbashkët me FSK-në “Reagimi i përbashkët”, që e ka vlerësuar mjaft të suksesshëm si dhe rënien e numrit të zjarreve, në krahasim me vitin e kaluar, duke e konsideruar këtë rezultat të vetëdijesimit të qytetarëve.

Po ashtu, Kadriu është përgjigjur në pyetjet e anëtarëve të Komitetit, për çështje konkrete nga fushëveprimtaria e kësaj drejtorie.

Njëherësh, Komiteti e ka miratuar edhe raportin e punës së vetë për këtë periudhë gjashtëmujore./rajonipress/