Komiteti i Arsimit rekomandon rritjen e numrit të bursave për studentë

Gjilan – Komiteti për Arsim (KA) i ka shqyrtuar të martën kriteret për ndarjen e bursave dhe shpërblimeve për studentët e dalluar të komunës së Gjilanit dhe me disa ndryshime të vogla, i ka rekomanduar Kuvendit Komunal miratimin e tyre në seancën e ardhshme, bashkë me propozimin për emërimin e komisionit për ndarjen e bursave.
Komiteti e mirëpriti propozimin e drejtorit të Arsimit, Bujar Nevzati për rritjen e numrit të bursave për studentët që studiojnë jashtë komunës së Gjilanit, nga 40 sa ishte vitin e kaluar, në 50. Ndërkaq, 30 bursa do të ndahen për studentët që studiojnë brenda komunës së Gjilanit.

Shkëlqim Latifi, kryesues i KA, ka thënë se vlera e bursave mbetet e njëjtë me vitin e kaluar. Studentët që ndjekin studimet në Gjilan, do të marrin nga 40 euro, ndërsa ata që studiojnë jashtë Gjilanit – 60 euro.

Bujar Nevzati, drejtor për Arsim, ka thënë se nevojat për bursa janë edhe më të mëdha, veçmas për studentët që vijojnë jashtë Gjilanit, por kaq lejojnë mundësitë buxhetore për këtë vit.

Komiteti vendosi që njëkohësisht t`i rekomandojë kryetarit të Komunës që të shikojë mundësitë buxhetore për rritjen në 100 të numrit të bursave.

Komiteti i mori parasysh edhe propozimet e anëtarëve të vetë që përparësi të kenë studentët e drejtimeve deficitare, ndërkaq nuk e mori parasysh propozimin për ndryshimin e kriterit për studentët e universiteteve publike, që poentohen me 2 pikë dhe atyre private, që poentohen me një pikë.

Komiteti mbështeti në mënyrë unanime edhe propozimin për nominimin e arsimtarit Nexhat Rexha për çmimin vjetor në nivel vendi “Shaban Jashari” që e ndan MASHT-i.

Shkëlqim Latifi, kryesues i Komitetit të Arsimit, ka thënë se në seancën e ardhshme të Kuvendit Komunal, pos këtyre rekomandimeve, në rend dite për miratim do të jenë edhe emërtimi i shkollave, që ende nuk janë pagëzuar si dhe rekomandimet tjera që janë dërguar nga ky Komitet. /rajonipress/