FC Zurich është kualifikuar në gjysmëfinale të Kupës së Zvicrës, pasi e mposhti 2-1 skuadrën SC Kriens.
Pas Baselit, një tjetër skuadër me shumë shqiptarë, është kualifikuar në gjysmëfinale të Kupës së Zvicrës, raporton Gazeta Express.
Bëhet fjalë për FC Zurich, që eliminoi në çerekfinale SC Kriens, duke mposhtur me rezultat 2-1.
Në këtë ndeshje, nga fillimi luajtën mbrojtësit e Kosovës, Mirlind Kryeziu dhe Benjamin Kololli.
Kololli, që në këtë ndeshje luajti si mesfushor i majtë, qëndroi në fushë vetëm 45 minuta.
Kurse mesfushori i Kosovës, Hekuran Kryeziu, u la për të pushuar në pjesën e parë. Ai u inkuadrua menjëherë në pjesën e dytë, min 46’.
Që të tre lojtarët e “Dardanëve” bën paraqitje të kënaqshme për klubin zviceran dhe u kualifikuan në gjysmëfinale, ashtu si të mërkurën Baseli i Zhegrovës, Ajetit e Xhakës.
Kurse Lugano i Leotrim Kryeziut dhe Armando Sadikut, u eliminua nga Thun. /Gazeta Express/
