Kollçaku: Presidenti nuk është i autorizuar për ta drejtuar dialogun

Duke komentuar deklaratën e presidentit Thaçi, nënkryetarja e Lëvizjes Vetëvendosje Fatmire Kollçaku ka thënë për “Zërin” se nuk mund të kuptohet ajo çfarë ka dashur të thotë kreu i shtetit mbi vijat e kuqe për dialogun, shkruan Gazeta “zëri”.

“Unë nuk mund ta kuptoj se në çfarë konteksti thuhet se nuk do të ketë vija të kuqe. A do të thotë kjo që edhe në qoftë se cenohet integriteti dhe sovraniteti i vendit nuk do të ketë vija të kuqe? Fillimisht është dashur të zgjidhen çështjet që kanë të bëjnë me luftën dhe me faktin që asnjëherë Serbia nuk ka kërkuar falje për krimet e bëra”, ka deklaruar ajo për “Zërin”.

Sipas Kollçakut, formati aktual i dialogut është i papranueshëm për Lëvizjen Vetëvendosje. Çdo dialog që zhvillohet pa e marrë pëlqimin nga Kuvendi i Kosovës dhe pa një konsensus nacional mbetet krejtësisht i papranueshëm.

“Ne mendojmë që presidenti nuk është i autorizuar për t’i zhvilluar bisedimet.

Para se të shkohet në çfarëdo dialogu duhet të diskutohet në Kuvendin e Kosovës”, ka potencuar Kollçaku./ZËRI