Kokëprerësit publikë

Nga Gëzim Mekuli – Radio Televizioni Publik i Kosovës (RTK), mediumi ynë i vetëm publik që, ndër tjerash, është i detyruar dhe duhet ta përfaqësojë e ta kultivojë kulturën, gjuhën, historinë e shkencën shqiptare, mbrëmë nuk e tha as dhe një fjalë për 80-vjetorin e lindjes së kolosit dhe monumentit të gjallë të kulturës, gjuhës, historisë e shkencës shqiptare.

Heshti mbrëmë “RTK” për akademik Rexhep Qosjen!
“RTK” nuk deshi, e injoroi e nuk e përmendi, e as nuk ia rikujtoj opinionit publik të Kosovës, ditëlindjen e prodhuesit më të madh veprave shkencore, akademik Rexhep Qosja.

E dhimbshme, e tmerrshme dhe e palejueshme të politizohet mediumi publik. Zhgënjyese për gazetarinë shqipe të Kosovës.

Po si nuk ka një reagim publik e moral nga “klubet” e shumta të gazetarëve shqiptarë të Kosovës?

A është e mundur, ju lutëm, si bëhet që (ende) nuk ka reagime as nga media e “pavarur” shqipe?

Politikat e gazetarisë së “RTK”-së dëshirojnë që emri “Rexhep Qosje” të harrohet; “RTK” planifikon që shqiptarët mos ta kujtojnë udhërrëfyesin shpirtëror e shkencor të kombit shqiptar. Gazetarët e shkret, të mediumit publik, “RTK”, dëshirojnë “ta vrasin” në publik autorin e mbi tridhjetë librave me studime për letërsinë, kritikë letrare, prozë artistike, tregime, romane dhe drama, publicistikë e shkrime polemike.

“RTK”-ja, e kapur nga parapolitika dhe e ndikuar nga pushtetet, mbrëmë e sot, edhe njëherë, tregoi se ky medium është i të gjithëve përpos i shqiptarëve.
“RTK”-ja mbrëmë e sot na tregoi se ky “klub mercenarësh” është në shërbim të klaneve ekonomike, interesave politike joshqiptare e në gatishmëri të plotë për të shkatërruar fotografinë e identitetit shqiptar të shqiptarëve që jetonin në ish-Jugosllavi.

“RTK”-ja mbrëmë, në edicioni kryesor të lajmeve, “pushkatoi” njërin prej protagonistëve të realitetit të sotëm historik e kulturor shqiptar.

Redaktorët politikë të “RTK”-së mbrëmë dhe jo vetëm mbrëmë, ia “prenë kokën” figurës poliedrike të shkencëtarit, eseistit, mendimtarit dhe pedagogut, intelektualit atdhetarit dhe qytetarit, që e ka lidhur jetën dhe krijimtarinë e tij me fatet e vendit dhe të kombit të tij, të kombit tonë një dhe të pandarë; kombit shqiptar.

Kjo poshtërsi publike gazetareske e kjo “kokëprerje publike” ndodh vetëm në gazetarinë (politikën) shqipe të Prishtinës e të Tiranës. Pikë!(epoka e re)