Kocijancic: Formimi i qeverisë, çështje e brendshme e Kosovës

“Formimi i qeverisë është çështje e brendshme e Kosovës e bazuar në rregulla dhe procedurat e parapara”, tha Maja Kocijancic, zëdhënëse e shefes së diplomacisë evropiane, Catherine Ashton.

Këto komente kocijancic i ka bërë duke iu referuar marrëveshjes së arritur të martën, në mes të liderëve të opozitë, sipas së cilës krijohen kushtet për formimin e qeverisë së re – pa partinë që mori shumicën e votave në zgjedhjet e 8 qershorit.

Kocijancic konfirmon se Përfaqësuesja e lartë e BE-së për Politikë të Jashtme dhe Siguri, Catherine Ashton, ka zhvilluar gjatë ditës së djeshme bisedë telefonike me kryeministrin aktual, Hashim Thaçin, me ç’rast, sipas Kocijancic, “janë diskutuar prospektet e ndryshme të procesit zgjedhor”.

Ndërkohë, zyrtarë nga kabineti i baroneshës Ashton, në kushte anonimiteti tërheqin vërejtjen se biseda e djeshme telefonike në asnjë mënyrë nuk mund të interpretohet si përkrahje e saj për një opcion politik, në këtë rast kryeministrin Thaçi.

Gjithnjë sipas këtyre zyrtarëve, për shefen e diplomacisë evropiane, gjëja më e rëndësishme është që qeveria e re kosovare, në cilëndo përbërje qoftë ajo, të konfirmojë përkushtimin ndaj procesit të normalizimit të raporteve me Serbinë.

“Për ne është tejet i rëndësishëm dialogu dhe vazhdimi i këtij procesi. Ndërsa, ne assesi nuk mund të shprehemi kundër një marrëveshjeje e cila është e bazuar në parime demokratike”, thanë burime të afërta me baroneshën Catherine Ashton. /rtk/Telegrafi/