Pozitë e opozitë janë bërë bashkë për të fshehur formularët e deklarimit të pasurisë së politikanëve të Kosovës. Në Kuvendin e Kosovës mund të duken si kundërshtarë të ashpër politikë, por kur vjen puna te pasuria, ata bëhen bashkë dhe nuk duan që opinioni të ketë qasje në luksin e tyre, shumica prej të cilëve dyshohet se e kanë ndërtuar duke keqpërdorur pozitat zyrtare.
Iniciativës së partisë në pushtet PDK, i janë bashkangjitur edhe partitë opozitare LDK dhe AAK për ndryshimin e Ligjit për Deklarimin e Pasurisë, neni 13, i cili ndalon publikimin online të formularëve, përveç Lëvizjes “Vetëvendosje”. E një gjë të tillë është duke e përkrahur edhe misioni i EULEX-it në Kosovë.
Para pak netësh në një darkë jozyrtare, përfaqësues të lartë të EULEX-it me disa anëtarë të shoqërisë civile të Kosovës, kanë shfaqur haptazi mbështetjen e tyre për mospublikimin e pasurisë në ueb-faqen e Agjencisë Kundër Korrupsionit (AKK), ashtu siç ndodh tash e tre vjet.
Dy burime, të pranishëm në këtë ky takim, e kanë konfirmuar për gazetën “Zëri” qëndrimin e zyrtarëve të EULEX-it. “Zyrtarët e lartë të EULEX-it në këtë takim joformal na kanë konfirmuar se po i japin përkrahje iniciativës së Ministrisë së Drejtësisë që ta bllokojnë qasjen e opinionit në formularët e deklarimit të pasurisë së politikanëve të Kosovës”, kanë thënë burimet e gazetës, të cilët kanë darkuar me zyrtarët e lartë të EULEX-it.
Zyrtarisht pyetjes së gazetës “Zëri” drejtuar zyrtarëve të EULEX-it se a e mbështesin një veprim të tillë, por nuk i janë përgjigjur gjatë ditës së martë….(Zëri)
