Koalicioni PDK-LDK bllokoi reformën rrënjësore në drejtësi

Ndikimi politik e lë Kosovën pa sundim të ligjit. Qeveria, në vend që t’i zbatojë, ajo i shkel ligjet, Kushtetutën, Konventën evropiane.

“Reformat në sistemin e drejtësisë po pengohen nga njerëzit e kësaj Qeverie aktuale, që, përveçse nuk janë të interesuar t’i bëjnë reformat, nuk po e mbështesin me buxhet… Sepse, sot për sistemin e drejtësisë ndahen më pak se 2% e totalit buxhetor, e që është i pamundur reformimi rrënjësor në drejtësi”, theksoi deputetja Albulena Haxhiu

Sistemi i drejtësisë në Kosovë, edhe pse mjaft i ri dhe pa shumë histori si i pavarur nga ndërkombëtarët, shumë shpejt e shfaqi nevojën për reformim dhe ristrukturim që të jetë më efikas dhe t’i përmbushë standardet e nevojshme, së pari për vetë qytetarët dhe së dyti si një nga kërkesat kyçe për anëtarësim në organizata ndërkombëtare.

Kështu, çdo ditë e më shumë një sistem i drejtë- sisë i suksesshëm dhe i pandikuar nga politika po shfaqet si nevojë e pashmangshme për një shtetndërtim të mirëfilltë të Kosovës. Sistemi i drejtë- sisë ra pre e ndikimeve dhe interesave të politikës, duke bërë kështu nganjëherë që në vend se të luftohen dukuritë negative, ato të ndihmohen.

Përveç kritikave që ky sistem merr vazhdimisht nga shoqëria civile dhe qytetarët e zhgënjyer, shpeshherë edhe vetë krerët institucionalë hodhën kritika drejt tij, duke ngritur çështjen që duhet bërë më shumë punë dhe përparim në këtë sistem, në mënyrë që të arrihet deri te luftimi i krimit dhe korrupsionit të aq përfolur në kohën e pasluftës në Kosovë.

Dren Ajeti, nga Grupi për Studime Politike dhe Juridike, tha për ”Kosova Sot” se reformimi i sistemit të drejtësisë në pjesën më të madhe është përfunduar me miratimin e Ligjit për Gjykatat e vitit 2011, kur edhe u vendos ndryshimi i strukturës gjyqësore në sistemin treshkallësh: Gjykatat Themelore me degët, ajo e Apelit dhe Gjykata Supreme si instancë më e lartë gjyqësore e Kosovës.” Gjatë zbatimit të këtij ligji janë vërejtur disa mangësi, me ç`rast ligji ka pësuar disa plotësime dhe ndryshime”, tha ai./kosova sot/