Mërgim Berisha është në kërkim të klubit të ri pasi është vënë në listën e shitjeve nga ana e Fenerbahçes.
Sulmuesi kosovar nuk e tregoi veten sa duhet në Stamboll dhe tash i ka bërë valixhet gati, në kërkim të një destinacioni të ri.
Sipas mediave italiane, interesim për futbollistin e lindur dhe të rritur në Gjermani ka shfaqur Sampdoria, shkruan “Gazeta Express”.
Klubi nga Genova e sheh 24 vjeçarin si zëvendësues ideal të Manuel De Lucas, i cili u operua së fundmi dhe do të mungojë gjashtë muaj.
Samp e kërkonte ish-përfaqësuesin U-21 të Gjermanisë edhe në janar, por Feneri s’kishte gjetur zëvendësim të tij dhe kishte vendosur ta mbante deri në fund të sezonit.
Berisha kishte shkëlqyer në fanellën e Salzburgut duke i realizuar 16 gola në 38 paraqitje, prej tyre edhe në Ligën e Kampionëve.
Ai vlerësohet 5 deri në 6 milionë euro nga Fenerbahçe, ndërsa Sampdoria synon ta marrë atë në formë huazimi me obligim blerjeje pas një viti, pasi e sheh atë si një profil interesant, për moshën dhe për karakteristikat.
Berisha është një sulmues i parë klasik, i fortë fizikisht, por mund të angazhohet edhe në krahun e djathtë, ndërsa posedon karakteristika ndryshe nga sulmuesit e tjërë që i ka në dispozicion trajneri Giampaolo, shkruan “Gazeta Express”.
Interesim për Berishën kanë shfaqur edhe Leeds United në Angli dhe Stuttgarti në Gjermani.
Berisha i ka zhvilluar 10 ndeshje me U-21 të Gjermanisë, ndërsa e kishte shënuar një gol. /Gazeta Express/
