Klientët shpërthejnë ndaj ETC-së në Gjilan: “Paguajmë qindra euro dhe trajtohemi si barrë në arkë”

Gjilan – Pakënaqësitë ndaj ETC në Gjilan po shtohen dita-ditës, ndërsa shumë qytetarë po e cilësojnë si të papranueshme gjendjen në sektorin e pagesave, ku sipas tyre, mungesa e funksionimit të shiritave transportues po u shkakton bezdi dhe trajtim jo dinjitoz klientëve.

Qytetarë të shumtë gjilanas kanë reaguar në rrjetet sociale dhe përmes mesazheve publike, duke u ankuar se në arkat e pagesës shiritat ku vendosen produktet nuk funksionojnë, duke detyruar klientët që vetë t’i bartin dhe t’i afrojnë produktet deri te arkëtarët, pavarësisht faturave të larta që paguajnë çdo ditë.

Sipas konsumatorëve, kjo situatë po vazhdon prej kohësh dhe pavarësisht ankesave të vazhdueshme, menaxhmenti lokal nuk ka ndërmarrë masa konkrete për eliminimin e problemit teknik.

“Është e papranueshme që në një market kaq të madh klienti të detyrohet të bëjë gjithçka vetë në arkë. Paguan qindra euro dhe në fund trajtohesh sikur je barrë për marketin”, ka shkruar një qytetar nga Gjilani.

Reagimet janë drejtuar edhe ndaj pronarit të ETC-së, Ramiz Kelmendi, nga i cili kërkohet të ndërhyjë drejtpërdrejt dhe të marrë masa ndaj menaxherëve lokalë që, sipas klientëve, kanë injoruar vazhdimisht ankesat.

“Sa promovon pasurinë dhe suksesin e kompanisë, aq duhet të merret edhe me kushtet e klientëve dhe punëtorëve. Kjo nuk mund të quhet më defekt teknik, por neglizhencë e qëllimshme”, thuhet në një tjetër reagim të publikuar nga konsumatorët gjilanas.

Klientët kërkojnë standarde më të mira shërbimi dhe respekt ndaj konsumatorit, duke theksuar se marketet e mëdha nuk duhet të funksionojnë me improvizime që rëndojnë përvojën e blerjes dhe cenojnë të drejtat bazike të klientëve./rajonipress/