KKSH në 2015-n do të angazhohet për shumë çështje me interes për shqiptarët

Në selinë e Këshillit Kombëtar Shqiptar (KKSH) në Bujanoc sot është mbajtur seanca solemne në ditën e fundit të vitit 2014. Në këtë takim të këshilltarëve si dhe liderëve të institucioneve lokale të Preshevës dhe Bujanocit, është uruar që viti 2015-të të jetë më i suksesshëm, ndërsa kryetari i KKSH-së Jonuz Musliu ka thënë se do të angazhohen për një sërë çështjetsh me interes për shqiptarët e Luginës së Preshevës.

“Në 2015-n do të angazhohemi për kthimin e Lapidarit të dëshmorëve të kombit të UÇPMB-së në Preshevë, për largimin e përmendores së serbëve mbi Lluçan, do të angazhohemi që Dogana e kufirit Tabanoc, Konçul dhe Depcë të kontrollohet nga Asociacioni i komunës së Preshevës, Bujanocit dhe Medvegjës, që Lugina e Preshevës të jetë pjesë e buxheteve të qeverisë së Shqipërisë dhe Kosovës, Komandanti i Policisë së Luginës të jetë Shqiptar, që referendumi i vitit 1992 të implementohet edhe vullneti i ish ushtarëve te UÇPMB-së e të implementohet kryeverdikti i popullit shqiptarë, demilitarizimi i Preshevës, Medvegjës dhe Bujanocit, do të njoftojmë Bashkimin Evropian, Shtetet e Bashkuara te Amerikës me gjendjen e shqiptarëve”, thuhet në njoftimin e kryetarit të KKSH-së, Jonuz Musliu.

Gjithashtu, janë numëruar edhe të arriturat e deritanishme të këtij organi që mbanë eksluzivitetin për mbrojtjen e interesave të shqiptarëve, në fushat që është kompetente. /Titulli.com/

Shpërndaje.
© RAJONIPRESS