KKR: Sovrani do ta sanksionojë Thaçin që s’po na e jep ministrinë

Koalicionin për Kosovë të Re, që bashkëqeveris me Partinë Demokratike të Kosovës në nivel qendror, ka nisur ta braktisë përmbajtja në aspektin deklarativ kundruall moszbatimit të marrëveshjes për ndarje të pushtetit nga Partia Demokratike, e cila do të duhej që t’ia jepte edhe një ministri.

Shefja e Grupit parlamentar të Koalicionit për Kosovë të Re, Myzejene Selmani, ka thënë të dielën se për moszbatimin e plotë të marrëveshjes me KKR-në, liderin e PDK-së, Hashim Thaçi, do të duhej që ta brente ndërgjegjja dhe se për një gjë të tillë ka për të marrë sanksionime nga sovrani.

“Kur i ke dikujt borxh deri në moment të fundit duhet të të brejë ndërgjegjja për ta kthyer borxhin. Kur t’i marrësh hua dikujt duhet ta dish që deri në atë minutë që t’ia kthesh borxhin duhet të të brejë ndërgjegjja. Edhe atë (Thaçin v.j.) duhet ta brejë ndërgjegjja për moszbatimin e marrëveshjes mes PDK-së dhe KKR-së”, ka thënë Selmani. “Vetë sovrani do ta sanksionojë atë (Thaçin v.j.)”, ka shtuar ajo.

Anëtarja e Kryesisë së Aleancës Kosova e Re ka thënë se koalicioni i partive të vogla i drejtuar nga Pacolli nuk e ka në plan që ta braktisë koalicionin qeverisës me PDK-në, pavarësisht moszbatimit të marrëveshjes për dhënien e ministrisë.

Aktualisht KKR-ja ka dy pozita të zv.kryeministrit (Pacolli dhe Kusari-Lila), Ministrinë e FSK-së, të Shëndetësisë, Tregtisë e Industrisë dhe Ministrinë e Diasporës, kurse ka zëvendësministra në MPJ, MFSK dhe në Ministrinë e Zhvillimit Ekonomik. Këtë të fundit është përfolur se po e kërkon ta marrë Pacolli(koha)