KH Drita pëson humbje nga Prishtina

Gjilan – Hendbollistët e Dritës kanë pësuar disfatë në Palestrën “Bashkim Selishta”- Petriti në Gjilan, nga skuadra e Prishtinës me rezultat 31-35.

Hendbollistët e Dritës gjatë edicionit të rregullt të garave me lehtësi e kishte mposhtur Prishtinën, por kësaj radhe hendbollistët nga kryeqendra e deshën më tepër fitoren.

Në pjesën e parë u zhvillua takim i barabartë, por në fund të pjesës së parë mysafirët arritën të krijojnë tre gola diferencë duke e përmbyllur me rezultat 13-16.

Hendbollistët e Dritës në pjesën e dytë treguan lojë të mirë, por prapë si në disa ndeshje të mëhershme në minutat e fundit të ndeshjes po humbin koncentrimin duke lejuar kundërshtarin të shënojnë, kjo dukuri u vërejt edhe në takimin e sotëm.
“Ishte një ndeshje shumë e fortë, dhamë gjithçka nga vetja por në fund po na humb koncentrimi që është bërë dukuri tek ne dhe kjo po na hakmerret, do të kemi rast ti revanshohemi skuadrës së Prishtinës të mërkurën”, ka bërë të ditur golashënuesi më i mirë i ndeshjes Misimi.

Hendbollisti më i mirë në radhët e Dritë ishte Gëzim Misimi i cili shënoj 16 gola.
Ndeshjen e radhës “bardh e kaltërtit” e Dritës e zhvillojnë të mërkurën ku do të takohen me Prishtinën./rajonipress/