KF Drita suspendon Ismet Munishin

Gjilan- Pas skandalit të një video në rrjetet sociale, kryesia e KF Dritës në një mbledhje të jashtëzakonshme ka suspenduar trajnerin e saj Ismet Munishin deri në zbardhjen e rastit.

Në reagimin e KF Dritës ndër të tjera thuhet:

Kryesia e Klubit “FC Drita” ka zhvilluar mbledhje të jashtëzakonshme ku pika kryesore e diskutimit ishte një video e publikuar në rrjetet sociale, ku i përfshirë është trajneri i skuadrës tonë Ismet Munishi.

Duke pasur parasysh reputacionin që ka klubi “Drita”, traditën e futbollit të kultivuar me sakrifica të mëdha nga njerëzit e qytetit të futbollit, mundin dhe investimet e shumta me dekada për t’a avancuar futbollin kosovarë, nuk mund të qëndrojmë duarkryq dhe pa kërkuar zbardhjen e rastit.
Duke i analizuar mirë rrethanat, Kryesia e Klubit merr vendim :
1. Suspendimin e trajnerit Ismet Munishi (Deri në zbardhjen e rastit në fjalë)
* ( Të gjithë të akuzuarit janë të pafajshëm deri sa institucionet vendosin ndryshe )
2. Kërkojmë urgjentisht nga Federata e Futbollit të Kosovës që të zëvendësoj treshen e gjyqtarëve të planifikuar për referim në ndeshjen FC Drita vs FC Prishtina.
Të gjithë dashamirët e futbollit dhe përcjellësit e Superligës së Kosovës janë dëshmitar që gjyqtari në fjalë ka qenë i akuzuar disa herë për referim të dobët.
Të gjendur në rrethana të tilla kërkojmë urgjentisht zbardhjen e rastit dhe të gjithë akterët e përfshirë t’a marrin dënimin e merituar.
Kryesia e Klubit “FC Drita” distancohet nga veprimet të cilat janë në kundërshtim me rregulloret e funksionimit të garave sportive në Kosovë.
Investimet e panumërta në klubin “FC Drita” shërbejnë për rritjen e cilësisë së futbollit, përmirësimit të infrastrukturës sportive dhe kultivimin e futbollit për t’i mundësuar gjeneratave të reja të merren me futboll.
Ngjarjet e fundit në Superligën e Kosovës prishin imazhin, dëmtojnë rënd futbollin dhe demotivojnë investitorët që japin gjithçka dhe nuk përfitojnë asgjë nga ky investim.
Është momenti i fundit që FFK-ja të veproj konkretisht në parandalimin e dukurive negative.
Nëse nuk merren masat e duhura, zhvillimi i kampionatit në këtë mënyrë nuk ka asnjë kuptim !/sylejman ismajli/rajonipress/