KF “Dardana” kërkon fitore në derbi

Gjilan – Loja e futbollit nuk njeh kufi pa marrë parasysh se në cilin nivel të garave bëjnë skuadrat futbollistike.
Të ënjtën në Komunën e Dardanës ish Kamenica, zhvillohet derbi i stinorit në mes Bashkimit të Koretinit dhe Dardanës e vlefshme për titull të kampionit në Ligën e II Grupi B.

Në fshatin Koretin të Dardanës dita e enjte do të jetë ditë futbollistike, ku i madh e i vogël do ta mësyn stadiumin e fshatit për të përcjellur derbin e stinorit futbollistik.

Skuadra e Bashkimit është lidere në tabelën e klasifikimit me 53 pikë ndërsa Dardana në pozitën e dytë me tri më pak 50 pikë.

Siç dihet prej shumë kohësh, këto dy skuadra kanë rivalitet tejet të madh pa marrë parasysh renditjen e tyre në tabelë.

Lirisht mund të theksohet se KF Dardana e cila për dy vite kishte pushuar aktivitetin e tyre futbollistik, ata në këtë vit përpos që u riaktivizuan me struktura profesionale në klub kanë arritur të jenë pretendent kryesor për titull të kampionit, i cili i dërgon drejtpërdrejt në Ligën e Parë të futbollit të Kosovës.

Në radhët e Dardanës janë mobilizuar si asnjëherë më parë që në këtë derbi të dalin fitues ku sipas tyre do të siguronin pozitën e parë, për këtë gjë është mjaft optimist edhe vet kryetari i klubit, Jakup Berisha.
“Ne për këtë ndeshje jemi të përgatitur maksimalisht, ne nuk lakmojmë në asnjë skuadër të Superligës ne kemi tifozët tanë të flakët të cilët çdo ditë e më tepër po i bashkëngjitet klubit tonë, sipas neve ne do të zhvillojmë këtë derbi me shpresë se do të ngadhnjejm dhe për këtë jam i bindur dhe besoj në futbollistët e mijë”.

Alfa Omega e Dardanëve padyshim është Sekretari i Klubit, Agim Kastrati, i cili me punën e tij të palodhshme ka arritur së bashku me strukturat e klubit ta riorganizon klubin dhe ta kthej në binarët e duhur.
“Befasia më e këndshme në futbollin e Kosovës është skuadra e Dardanës, pas pauzimit dy vjeçar jemi rikthyer në mënyrë triumfale e gjithë kjo është meritë e të rinjëve të Dardanës, tani jemi në vlugun më të madh të garave ndërsa për derbin ndaj Bashkimit të Koretinit kemi arritur të mobilizohemi si kryesi, tifozë e futbollistë, ne besojmë në aftësitë tona dhe me padurim presim këtë derbi të qytetit të Dardanës, do të jetë një spektakël futbollistik ndërsa ne do t’ia arrijmë qëllimin final”.

Sulmuesit e Dardanës janë më efikasit në futbollin e Kosovës ata gjerë më tani kanë shënuar 79 gola duke pranuar 21, ndërsa në radhët e Bashkimit në nivel të kënaqshëm është mbrojtja e cila ka pranuar vetëm 9 gola ndërsa sulmuesit kanë qenë efikas me 58 gola.

Se kush do të fitoj betejën sulmuesit apo mbrojtja mbetet të shihet të Enjten, por një gjë është e sigurt se na pret një derbi jashtëzakonisht i zjarrtë./sylejman ismajli/rajonipress/