Kështu ishte viti 2015 për Edona Llalloshin

Këngëtarja e mirënjohur, Edona Llalloshi javë më parë lansoi projektin e fundit për këtë vit, baladën “Sonte”.

Në një bisedë për Indeksonline, ajo ka folur për të arriturat gjatë vitit që po e lëmë pas.

“Viti 2015 ka qenë një vit shumë i suksesshëm, një vit i mbarë. Gjatë këtij viti kam realizuar tre këngë dhe videoklipe. Fillimi i vitit me këngën kushtuar heroit Agim Ramadani, dy balada që janë pëlqyer mjaftë shumë nga ana e publikut, pastaj kam lansuar albumin live, dhe shumë e shumë mbrëmje e aktivitete të ndryshme muzikore”, ka thënë Llalloshi. Megjithëse thotë se ka pasur shumë angazhimë, këngëtarja në fjalë, thotë se asnjëherë nuk lë anash më të dashurit e saj, bashkëshortin dhe vajzën e saj.

“Familja është gjëja më e shtrenjtë për mua, megjithëse kam angazhime të shumta mundohem që asnjëherë mos t’i lë anash, andaj për pushime kam qenë me familje në Dubai, ku dhe kam kaluar ditë shumë të mira. Me një fjalë, mund të them se viti 2015 ka qenë një vit fantastik për mua”.