Kërkohet drejtësi për viktimat, dënime për kriminelët

Janë mbushur 15 vjet qëkur në veri të Mitrovicës u vranë 10 shqiptarë, 25 u plagosën rëndë, u keqtrajtuan 93, ndërsa u dëbuan nga shtëpitë dhe pronat e tyre mbi 12 mijë shqiptarë. Për këto vepra kriminale janë akuzuar pesë serbë, në mesin e të cilëve edhe Oliver Ivanoviq, një prej liderëve serbë më në zë në veri të Mitrovicës.

Gjykimi ndaj tyre ka filluar, ndërsa në 15-vjetorin e krimit që u krye në sy të forcave paqeruajtëse të KFOR-it, familjarët e viktimave kanë kërkuar dënimin për autorët dhe urdhërdhënësit e krimit më të rëndë të pasluftës në veri të Mitrovicës.

Emir Azemi, zëvendëskryesues i Kuvendit të Mitrovicës së Veriut, ka pyetur se kur do të vendoset drejtësia, ndonëse kanë kaluar 15 vjet nga vrasjet, maltretimet dhe dëbimet e shqiptarëve nga pronat e tyre në veri./zeri/