Kërkesë për paraburgim ndaj të dyshuarit që vuri në qarkullim barëra të dëmshme

Gjilan – Prokuroria Themelore në Gjilan, dje rreth orës 18:00h, ka ndaluar të dyshuarin B.K., në kohëzgjatje prej 48 orësh, ndërsa sot ndaj tij ka paraqitur kërkesën për caktimin e masës së paraburgimit, në Gjykatën kompetente në Gjilan.

Sipas kërkesës, ekziston dyshimi i bazuar se, më 22 shkurt 2019, në komunën e Kamenicës, në barnatoren “Greta Pharm”, pas kontrollimit nga Inspektorati Farmaceutik – Ministria e Shëndetësisë, u konstatua se i dyshuari B.K., ka vënë në qarkullim një sasi të konsiderueshme të barërave pas datës së skadimit, të cilat janë të dëmshme për shëndet.

Gjithashtu, i dyshuari, në mënyrë të kundërligjshme ka ushtruar veprimtari farmaceutike, në atë mënyrë që edhe përkundër asaj që i njëjti me profesion është ekonomist, pa kualifikim adekuat profesional ka ofruar shërbime farmaceutike.

Në këtë mënyrë, dyshohet të ketë kryer veprat penale, “Prodhimi dhe shpërndarja e produkteve të dëmshme mjekësore” dhe “Ushtrimi i kundërligjshëm i veprimtarisë mjekësore ose farmaceutike” thuhet në njoftimin e Prokurorisë së Gjilanit./rajonipress/